About

"ރަސްއައިން" އެޕް

"ރަސްއައިން" އެޕް ވުޖޫދުވެގެން އައުމަކީ، ރާއްޖޭގެ މަސްވެރިންނަށް، މަސްވެރިކަމުގެ ހަރަކާތްތައް އިތުރު ހަރުފަތަކަށް ގެންގޮސް، ޓެކްނޮލޮޖީގެ ބޭނުން ހިފުމަށް ލިބިގެންދާނޭ ވަރަށް ބޮޑު ފަސޭހައަކަށް ވެގެންދާނެއެވެ. ވިސްނުންތެރިކަމާއެކު މި އެޕް ފަރުމާކޮށްފައިވަނީ، މަސްވެރިންނަށް ފުރިހަމަ އެހީތެރިކަމެއް ފޯރުކޮށްދެވޭނޭ ގޮތަށް މައިގަނޑު ތިން ޓެބެއް ހިމެނޭ ގޮތަށެވެ.

މެޕް އަދި މޫސުމާ ބެހޭ އެލާޓްތައް

އެޕްގެ ފުރަތަމަ ޓެބުގައި މޯލްޑިވްސް މީޓިއޮރޮލޮޖިކަލް ސާރވިސްއިން ނެރޭ މޫސުމާބެހޭ އެލާޓް ފަދަ މުހިންމު މަޢުލޫމާތުތައް ހިމެނުމުގެ އިތުރުން، ދިވެހިރާއްޖޭގެ މެޕް ފެންނަން ހުންނާނެއެވެ. މި ފީޗާތަކުގެ ސަބަބުން މަސްވެރިންނަށް މޫސުމަށް އަންނަ ބަދަލުތަކުގެ މަޢުލޫމާތު ފަސޭހައިން ލިބި، ކަނޑު ދަތުރުފަތުރު ކުރުމުގައި ރައްކާތެރިކަން ކަށަވަރުކޮށްދިނުމުގައި އިތުރު އެހީއަކަށް ވާނެއެވެ.

ދިޔަވަރާއި އޮއިވަރުގެ މަޢުލޫމާތު

ދެވަނަ ޓެބް، ޚާއްޞަކޮށްފައިވަނީ ރާއްޖޭގެ ކަނޑުތަކުގެ ދިޔަވަރާއި އޮއިވަރުގެ މަޢުލޫމާތުގެ މައްޗަށެވެ. އެގޮތުން ކަނޑުގައި މަސް ދަތުރުކުރާ ތަބީޢަތާއި، މަސް މައިގްރޭޓްވުމުގެ ޕެޓާން ބިނާވެފައި އޮންނަނީ ކަނޑުތަކުގެ ދިޔަވަރާއި އޮއިވަރަށް ކަމުގައިވާއިރު، ކާމިޔާބު މަސްވެރިކަމެއް ކުރުމުގައި ކަނޑުތަކުގެ ދިޔަވަރާއި އޮއިވަރަކީ ކޮންމެހެން ދެނެގަންނަން ޖެހޭ މަޢުލޫމާތެކެވެ.

އުޅަނދު މެސެޖްތަކާއި އެލާޓްތައް

އެޕްގެ ތިންވަނަ ޓެބަކީ މުވާސަލާތީ ހަބެއްގެ ގޮތުގައި ބޭނުންކުރެވިދާނެ ޓެބެކެވެ. އެގޮތުން، ކޯސްޓްގާރޑް ނުވަތަ އެމް.އާރ.ސީ.ސީ ފަދަ މުވައްސަސާތަކުން ފޮނުވާ މެސެޖުތައް މި ބައިގައި ފެންނަން ހުންނައިރު، އޭގެ ސަބަބުން މަސްވެރި އުޅަނދުތަކުގެ މެދުގައި ހަރަކާތްތައް ކޯޑިނޭޓްކުރުމަށް ޓަކައި ކޮންމެހެން ބޭނުންވާ މެސެޖްތައް ދައުރުކުރުމަށް އިތުރު ލުއި ފަސޭހައެއް ލިބިގެންދާނެއެވެ.